Just Wanna Say It !!!

بقيت بحب التفاصيل عشان اما بتتجمع مع بعض جزء مع جزء بيبين جزء كبير أوى من الموضوع و بيخلى الرؤية أوضح بمعنى إنى لو ركزت فى تفاصيل مشكلة ما دة هيخلينى أقدر أعرف أسبابها و مخليهاش تتكرر تانى إنى بشوف التفاصيل دة فى بعض الأحيان بيبقى عامل زي الضوء اللى بيبقى موجود ع بعد كبير منى و أنا واقفة فى الضلمة فى الحالة دى مبركزش فى الضلمة اللى أنا فيها لأنى ببقى شايفة ان الدنيا منورة قدامى ع الرغم من أنى فى الضلمة

بحب أفكر نفسى دايما إن محدش هينفعنى غيرى و إن الدنيا مش بتقف ع حد اللى معايا إنهاردة بكرة إحتمال كبير ميبقاش معايا بحب أفكر نفسى بردة أنى أخليها دايما مستعدة ان فى أي لحظة تقدر تعيد نفسها و تطور نفسها و متقفش دايما عند أى عقبة بحب أفكر نفسى إنى لازم أفكر فيها شوية و مش كل حاجة أجى عليها عشان أى حد تانى لأن الحد التانى دة مش دايم ليها بحب أفكر نفسى إنها تخلى بالها عليها و تحافظ عليها و متسمحش لحد يأثر عليها بأثر سلبى كفاية كدة لحد دلوقتى :))

حاسة إنى بقيت عاملة زي اللى كان فى جرة و طلع لبرة أو أنى كنت محبوسةو خرجت لا أنا عارفة أرجع للجرة بتاعتى تانى و لا عارفة أتعايش مع اللى بقيت فى مش عارفة الدنيا هي اللى بقت واسعة عليا و لا أنا اللى كانت دنيتى صغيرة و لا أنا كنت بلعب ع الشط و مرة واحدة حد خدنى فى وسط البحر و رمانى و قالى عومى و انا مبعرفش أعوم مش عارفة هعرف أتعلم العوم و لا هتعب من كتر ما بعافر عشان مغرقش و مش هلاقى حد ينجدنى * جزء من رباعيات لصلاح جاهين غناها منير فى أغنية إيديا فى جيوبى Link Click Here :)