Just Wanna Say It !!!

اصلاً انا مينفعش اكون زعلانة اساساً  عشان اي حاجة ف الحياة عشان مش فارقة اي حاجة اصلاً و ان الواحد يكون مبسوط ده قرار و لازم اللي ياخده يسترجل كده و يكون قده عشان ميزعلش و مع ذلك مفيش مانع من الخبطات اللي بتحصل دي سنه الحياة بس الشطارة انها تاخدها و انت بتضحك كده و ميفرقش معاك ، انا لحد انهاردة بحاول اعمل كده و هفضل احاول و اعافر عشان قلبي لسه متعبش من المشاوير :) 

عندي يقين ان دايماً ربنا شايلي الخير و ان مفيش اي حاجة بتحصلي غير لو فيها خير ليا حتى لو ده مش ظاهرلي بس اكيد هعرف الخير ف اللي بيحصلي يوماً ما و انا مش مستعجلة :)

 بس اللي اكتشفته اني شخص ممل مفيش اكشن ف الحياة الا حاجات بسيطة ف الشغل و ده العادي غير كده معنديش حوارات بالتالي مفيش جديد بيحصل عندي خالص

راجعة ف يوم من شغلي و كنت متكدرة جداً و مش طايقة نفسي و الاقي بنت بنت خالتي ٥ سنين مثلا او اقل كانت تعبانة و محجوزة ف المستشفي رجعت و اول ما شافتني راحت سلمت عليا و باست ايدي و بعدها اللي هو نسيت فعلاً كل التكدير و انبسطت بيها و كنت عايزة اجيبلها كل الحاجات الحلوة اللي ف الدنيا سبحان الله ع حنية الأطفال و جمالهم :)) 

فكرة ان الواحد خلاص كمل 24 سنة دي مرعبة خاصة لو دايماً عنده احساس انه هيموت صغير او مش احساس ع قد ما عايزة كدة يمكن عشان شوفت ناس كتير كبيرة و تعبانة ف مش عايزة اتعب كدة مع ان في ناس كتير كبيرة و صحتها كويسة بس تقول اية بقى ف النكد يعني ... المهم يعني ان انا اي سن وصلت ليه بعد ال 21 بالنسبالي مش حلو يمكن عشان لسه فاكرة يوم ما كملت 21 كنت ف بيت ألاء صاحبتي انا و أماني بنشتغل ع مشروع التخرج و لقيت عندهم جيتار مسكتة و انا كانت اول مرة ف حياتي امسك جيتار و لعبت عليه و غنيت امبارح كان عمري عشرين و صوروني فيديو مشوفتوش ليومنا دة الحمدلله يعني و كان في شقلبظات ساعتها ... المهم حبيبتي ريكو اما بقولها ع موضوع عدم حبي لأي سن بعد 21 قالتلي اني غلط و لازم ابسط نفسي و استمتع بسني دة و متضايقش بالعكس اخدة عادي كدة و افرح و انبسط و اخرج و اجيب هدايا لنفسي ما هو اصل مش هستني حد يجيبلي .. و كمان حاجة اني فعلاً مقصرة ف حق نفسي كتير و دايماً كنت بقلل منها مع انها كويسة خالص والله :) المهم يعني ان اليوم دة مميز ف انا شكلي هحبة و هفضل فيه كتير شوية لحد ما نزهق من بعض بقى .. ختاماً يعني لو في أ...

و بعد معاندة مع النفس  كده اكتشفت ان محدش كان بيقلل من نفسي غير نفسي و لذلك قررت احب نفسي و اثق فيها شويه عشان اريحها ف تريحنى 

الاحساس الرخم ده انك لو انبسطت او اتضايقت مش هتلاقي حد تحكيله عن اي حاجة اللي هو تبقي حاسس انك لوحدك مع ان حواليك ناس كتير :/