يا مجلس عسكر عالى رد علينا بتقولوا عدل و حق و تظلموا فينا من التراس وايت نايت

مش عارفة ابدأ من فين بس استجابة للمطالبة بكسر التعتيم الاعلامى للكتابة عن المجلس العسكري فا انا هكتب المدونة دى .و استحملونى للأخر من فضلكم J

طيب الناس كل ما نقولهم مش شايفين المجلس عامل فينا اية يقولك حرام عليكوا دة العمود الفاضل فى البيت لو وقع البلد هتضيع و الكائنات الفضائية هتيجى تحتلنا و هنبقى عراق تانى طبعا عراق دة اتطورت بعد الاحداث اللى حصلت و بقت هنبقى ليبا (مش عارفة ازاى و اصلا ليبيا معندهاش جيش:S دى مليشيات القذافى ) و بعد اللى حصل فى سوريا بقينا هنبقى سوريا تانية(Bashar mawet sha3bo :S) الحمدلله مينفعش نبقى زى اليمنJ .

طيب يا جماعة احنا مش بنكلم عن الجيش عشان الجيش دة بتاعنا و اخواتنا و صحابنا و قرايبنا فية و اكيد دول مش هيضربوا فى اخواتهم يعنى .) كدة انا فى السليم J(

بنكلم عن مين عن المجلس العسكرى ..... ايون المجلس العسكرى ليية و عملكم اية , مش عارفة الصراحة لسة بحاول افهم طيب تعالوا نشوف شوية حاجات كدة حصلت و نفكر بعض بيها و نشوف ليية بنكلم عن المجلس العسكرى ........

اول حاجة نكلم عنها عشان واجعة ناس كتير اوى و الناس اللى فى البيت مش بتصدق ان ناس مننا فعلت بيعملوا فى ولادهم كدة و هما حاميين الشرعية الثورية و كلام الحلو دة , نبدأ بفض الاعتصامات بالقوة و غدرا كدة, بليل بعد ما القنوات التليفزيونية تمشى نقوم اية مدخلين حبة بلطجية مفيش مانع من شوية مولوتوف معاهم) اصلة سهل و الاطفال فى الشارع بقى دة لعبتهم بدل الاولى و سى سى سندريلا بالنسبة للبنات(. و دخل البلطجية و هوب جوة الكادر البلطجية بيجروا ورا المعتصمين و من بعيد الشرطة العسكرية بتتفرج , و اول ما يدخلوا يخبطوا فى كلة (قال يعنى هما بيفوضوا شغب و صعبان عليهم الشباب دة طيبين اوى يا شعب جاحد صعبان عليهم يشوفوكم بتضربوا من الأغراب اخس عليكم !!!)

و طبعا انا مش هحكى عن الشباب اللى زى الورد اللى كان بيتسحب ع المتحف المصرى يتعذب و يحصل فية انتهاكات شنيعة متتعملش لأى حد مهما كانت درجة اجرامة و حتى البنات متعفوش من القصة دى (عشان بيحققوا مبدأ المساواة يا شعب جاحد بردة الولد زية زى البنت الاتنين بيتعذبوا !!!).

و طبعا بردة انا مش هقول ع المحاكمات العسكرية اللى بتطلع الأحكام فيها بسرعة الصاروخ و ع مين ع الشباب الحلو دة اللى عمل الثورة اى و الله بقوا مجرمين و مخربين و كائنات فضائية بردة بتمولهم و بتساعدهم على تخريب البلد .

لأ و اييييييييييييية و شبابنا بيتحاكم سايبين النجم مستكنيص فى شرم فى حاجة ولا الخيال محدش يحلم بيها يعنى و مراتة معاة اول ما يسمع كلمة طرة من هنا يجيلوا العصبى و يدخل مستشفى بردة ميحلمش بيها شعبنا البسيط دة اللى هو اخرنا مستشفى القصر العينى و اما نتطور نروح حتة حنينة بردة الحاجات العالية دى مش بيبوصوا عليها .

و مش هكلم بردة عن الناس اللى عمالة تاخد فى خمستاشرات و تخرج اما الناس تركز فى حتة تانية , و مش هكلم بردة عن الحتة التانية دى اللى هما ما شاء الله اساتذة فى اختراع حتت تحول نظر الناس عن القضية الاساسية و ينشغلوا فى حاجات فرعية !!!!

و مش هقول بردة ان هما السبب فى حالة الركود اللى حصلت للناس اللى مقتنعة ان مادام مبارك و العادلى و احمد عز بيتحقق معاهم أو محبوسين تحت قضية يبقى كدة دمرنا النظام و خلاص احنا كدة بقينا فلة و مش ناقصنا حاجة ,

و مش هقول بردة ان دلوقتى لو حد من الناس دى لو شاف حد بيعيب فى المجلس ممكن يضربة !!!! و لا انة انتشرت الاقاويل عن ان النزول يوم 27 مايو خيانة للبلد .

و بردة مش هكلم على الناس بتوع السفارة والحرب اللى خاضوها من كم الغازات المسيلة و الرصاص الحى اللى هيقولى مطاطى هقولة خد جولة هنا كدة فى المدونة دى شوف عاطف حصلة اية

http://eldoctorwelkababgy.blogspot.com/2011/05/blog-post.html

ولا لية متكلمش ما انا كنت هناك اة والله و الناس دى كان اخرها تهتف و تحرق كام علم يعنى و صحف عالمية جت غطت الحدث .

و كنا كويسين اوى لحد الساعة 8 اما انا مشيت و طبعا كالعادة الهتاف بتاع (الجيش و الشعب ايد واحدة) انا الهتاف دة اما بيتقال بيقى يوم مش هيعدى اصلا هتاف شؤم يعنى.

و اول ما روحت لقيت بقدرة قادر الناس بتتصل رضوى انتى كويسة فى اية يا جماعة اصلة اتفتح الضرب ع المتظاهرين و قناة التحوير (المحور سابقا) بيتقول ان واحد اتصل بيها يقولها قال اية قال اقتحموا السفارة سفارة اية بس الناس كانت واقفة بس و اصلا الحاجز دة كان ضعيف جداا لو واحد صحتة كويسة ريح علية خلاص وقع يعنى قمة التهريج .

اة نسيت اقول و احنا واقفين تحت بقوا يرفعوا و ينزلوا العلم استفزاز لينا يعنى حاجة مقرفة !!!!!!

بس و ابتدا الضرب من هنا و هناك و قعدا يقبضوا ع الناس و اغلبهم اصلا طلبة جامعة و ثانوى و ناس تانية كتير بس الأغلبية طلبة لسة و كلهم تقريبا خدوا سنة مع ايقاف التنفيذ ليية يا فندم .

قال اية تخريب منشأت و تعدى ع موظف و حاجات عجيبة كدة و سبحان الله الاحكام فى الناس دى بتطلع هوا انما النجم اللى مشرف فى شرم ولا العادلى اللى فى طرة عمال يتحاكم فى حاجات هبلة امال امتى هنحاكم الناس اللى قتلوا المتظاهرين و ضربوا عليهم رصاص حى مش بكلم ع الناس اللى هجمت ع الأقسام دى ليهم قصة تانية .

و طبعا مش هكلم ع الحوار الوطنى بقى عشان دة بجد كان فلة فلة يعنى ناصع البياض ماشاء الله كان مرشق ناس حزب واطى و صحف قومية (يعنى !!) قال يعنى دول لو قادرين يعدلوا المايل كنا بقينا عاملين كدة دلوقتى .

و اخيراا و ليس أخراا مش هكلم عن الاستفتاء اللى اثبت اننا صحيح قلة مندسة و جاحدين عشان احنا قولنا لأ و الشرعية بتاعة المجلس نقصت 4 مليون باين صوت من ال 18 مليون اللى راحوا كان لازم نقول نعم طبعا احنا ازاى مديناش شرعية المجلس الحبة دول (شعب جاحد :@:@).

طيب امال هتكلمى فى اية ولا حاجة انا معنديش حاجة اقولها عشان اية (الجيش و الشعب ايد واحدة ) و انا محبش ازعل جزء منى اتربيت ع كدة :D:D

ع فكرة انا مش هحط لا فيديو ولا صور الكلام معبر لوحدة ولا اية ؟؟

و ع فكرة برضة انا مش لاقية اى حل للمشاكل دى كلها , انا بحاول الاقى اجابة ليها مش عارفة بس اللى عارفاة ان الشعب دة اما ثار ع الظلم كان كل مطالبة بسيطة اوى عيش حرية عدالة اجتماعية بسيطة والله مقالوش عايزين قصور ولا ملايين عايزين بس يعيشوا كويس و دة مش كتير ع شعب داق ذل و مهانة و استحمل 30 سنة و بالذات اخر 6 سنين كانوا عذاب و نسبة البطالة زادت و الاسعار عليت و الوضع بقى صعب الناس مش هتستحمل 30 سنة كمان عشان تعيش كويس .

لو اى حد شايف حل يقدر يحل المشاكل دى يا ريت يساعدنى و يحطنى ع اول الطريق عشان اعرف الحل فى الاخر .

23 مايو يوم كسر التعتيم الاعلامى عن المجلس العسكرى