برنامجى للرياسة 2012

رضوى فتحى مرشحتكم للرياسة

أنا رضوى عندى 21 سنة و هكمل 22 سنة الشهر الجاى و عايزة ارشح نفسى للرياسة و طبعا نظرا للشروط المجحفة للرياسة انى لازم يبقى عندى 40 سنة ف طلعت بفكرة عظيمة مستوحاة من فيلم أجنبى أكييد انى أستلف ال 18 سنة اللى فاضلينلى دول من أى حد و فى سبيل دة أنا هظبط البلد فى الفترة دى و هخليها فلة أصلا و الشعب هينبسط أخر انبساط أى والله .

و هذا فقد قررت ان اعرض برنامجى الأنتخابى عليكوا و أنا عرضت جزء منة ع المواطنين و لاقى استحسان الكثيرين "كلام كبير – ريسة بقى "

أول حاجة طبعا لو عملتوا مظاهرات ضدى دى حاجة غير مقبولة و أكييييييييد مش هستخدم الجو السيس بتاع الداخلية دة و اضرب خرطوش و غاز لأاااا طبعا أنا هضرب فى المليان عشان أكييد محدش هيثور ضدى دة أنا فُلة أصلا و هظبط الشعب كلة,,,,,

بالنسبة للمشاريع بقى و يقولك البلد مفيهاش فلوس أنا بقى هجيب الفلوس ,, سألتونى منين هقولكم حالااااا مشروع التأميم بقى مش هاخد جزء من الثروة بتاعة الأغنيا زى الظباط الأحرار لأ دة انا هاخد كل حاجة و هقعدهم ف العشوائيات عقابا ليهم عشان مكنوش محققين عدالة إجتماعية ولا كانوا بيساعدوا فى نهضة البلد و القضاء ع العشوائيات و هما كان ليهم دور كبير ف انها تزيد بقى و الوضع الضلمة اللى وصلنا لية بس طبعا هيبقى لفترة من الزمن بعد كدة هديهم مكان كويس يعيشوا فية و وظيفة كويسة يعيشوا منها.

والسكان اللى كانوا ساكنين فى العشوائيات هظبطهم اخر حاجة و هقعدهم فى شقق زى الفل و هأهلهم اجتماعيا و نفسيا و كل حاجة و لو مش متعلميين هعلمهم و هوظفهم فى مهنة محترمة تخليهم يقدروا يعيشوا كويس بعد كدة.

بالنسبة بقى للرياضة بقى فرق الكورة دي كلها هقعدهم ف البيت احنا ف مرحلة بناء مش هبل و هشغلهم ف مصنع تريكوه بقى عشان ميبقوش عاطليين + إنهم اصلا فشلة و مش بيجيبوا بطولات بالأضافة انهم منتخب المخلوع مش منتخب مصر و هدعم كل الرياضات التانية اللى مشرفانا و بتجيب بطولات و هما دول اللى مشرفينا بجد زى الأسكواش و التنس و كرة اليد حتى مع انهم بيفشلوا كتير بس كويسين و هدعم الباسكت بردة عشان عندنا لعيبة كويسين ,,, إنما كورة الله يرحمها بقى .

بالنسبة بقى للأحزاب المستعبطة و عاملة سياسية و هما اصلا أحزاب دينية معنديش الكلام دة أصلا مفيش حاجة اسمها حزب سياسي منظر و هو دينى اصلا مش طالبة عك اللى هيعمل كدة هحبسة و هعرفة ان الله حق عشان يبقى يعك تانى .

و بالنسبة لفصيل الاخوان مثلا دول هخليهم حزب عادي بس هكدرهم اخر حاجة عشان يتعلموا الادب و همنع عنهم التمويل الخارجى و النور بردة عايزين يلعبوا سياسة يبقى بنضافة هيعملو فيها شيوخ ,"شاهد الفقرة السابقة"

المشروع الصحى بقى أول حاجة ههد كل المستشفيات و المستوصفات الحكومية الغير مطابقة للمواصفات و هبنيها ع أعلى مستوى هخلى الناس تبقى عايزة تروح المستشفيات الحكومى مش عشان أحسن من الخاصة لأاااا أبسولوتلى عشان مفيش مستشفيات خاصة أصلا ,,,,,,,,

طبعا الدكاترة و طلبة الطب دول محتاجين عمرة اصلا هسفرهم منحة كدة بلاد برة يتعلمو و يتنوروا و يرجعوا كويسين يخدموا البلد برموش عينيهم اى والله ,,,,

بالنسبة للتعليم بقى ملعبى دة طبعا كل المدرسات و المدرسين بتوع المدراس الحكومية هفجرهم إلا من رحم ربى يعنى عشان هما السبب فى خراب التعليم و المدارس الخاصة بردة عشان عايزين الضرب و المدارس الحكومية دى ههدها اصلا و هبنى مدارس محترمة بفصول محترمة و هغير مناهج التعليم العقيمة دى و هجيب اساتذة و خبراء يعملوا مناهج محترمة تنمى ذكاء العيال و تخليهم عيال منتجة و مخترعيين من صغرهم .

بالنسبة للتكنولوجيا طبعا هيكون ليها مساحة كبيرة جداا فى اهتماماتى + ان تركيا مش أحسن مننا مش هما ادوا اى باد لكل طفل انا بقى هعلم الطفل ازاى يعمل الأى باد دة و طبعا هيبقى ليهم مساعدات كتيرة و هيتم دعم المتفوق فيهم عشان يتفوق أكتر و هشجع التانى عشان يبقى متفوق بردة عشان تفوقهم دة مصلحة للبلد و متقوليش المخترع الصغير و الحاجات دى لأ هيبقى شغل بجد عشان نقدر نقدم شباب بعد كدة يبقى عارف طريقة صح و قادر يحدد أهدافة صح و أهم حاجة هخلى عندهم استخدام المصادر المتاحة يعنى نقول لمايكروسوفت باى باي احنا أجمد منك يا شاطرة

بالنسبة للأعلام بقى طبعا إطلاق الحريات و هخلى قطاع الأخبار دة مستقل و طبعا بالنسبة للسينما مفيش حاجة اسمها افلام هابطة و الهانص فى الدانص دة مفيش منة لو فيلم ملوش قصة مش هيتعرض أصلا إحنا بنبنى العقول مش بنهدها و اى إسفاف غير مقبول أصلا و الناس اللى عايزة تظيط لو جابتلى سيناريو محترم و كويس و مش مسف معاها غير كدة هرميها فى الباسكت

و طبعا يا إخوانى و أخواتى ببرنامجى العظيم دة أقدر اضمنلكم ان بعد سنتين هيحصل ثورة عليا و هموتهم كلهم عشان الشباب الطاهر بتاع 25 يناير هيكون واخد حقة يبقى دول الفلول نخلص منهم قشطة ,,,,,

الله الوطن الزعيمة رضوى فتحى ,,,,,