مهاترات نفسيه ... قصص حزينة 1
في حقيقة الأمر يعني , و بعد كام سنة الواحد عايش فيهم و مع الوضع الحالي , اكتشفت ان فعلا محدش هياخد باله مني غير نفسي و أمي و شكرا ع كده .
و ده مش ذم ف حد بس فعلا الحياة بقت صعبة علينا كلنا و بقينا كلنا بنلف ف ساقية الحياة و بقينا قصص حزينة فشخ ع رأي حافظ ربنا يرحمه , و القصص الحزينة دي مش سببها حاجة غير الضغوط و الحوارات اللي غصب عننا لازم نتعامل معاها يوميا.
الضغوط دي ممكن يكون ليها أسباب كتيرة بس ممكن تخلي حد ممكن يكون قدرتة ع المواجهة ضعيفة شوية يفكر يخلص من حياته عشان يرتاح من ال overthinking اللي مش عايز يسيبه ف حالة.
و الضغوط دي بردة ممكن يكون سببها صحابك اللي مش قادرين يفهموا حالتك النفسية ولا قادرين يكونوا ع قدر من الصراحة معاك ف اي موضوع تاخد رأيهم فيه , يعني وجودهم زي عدمه للأسف !
الضغوط دي سببها انك انت شخصيا مش قادر تفهم نفسك ولا عارف تحدد انت عايز تعمل ايه , او عايز تعيش حياتك ازاي , مشاكلك مبتتحلش مع كل النشاطات اللي بتعملها , دايما حاسس انك غريب وسط اي مجموعة تبقي قاعد معاها...
الضغوط دي سببها ان مرتبك مش بيكفيك , و ان عندك التزامات اكبر من اللي بيدخلك ف الشهر , ف بقيت متضايق و حاسس بالعجز .
و ع الناحية التانية عندك وظيفة بتاخد كل وقتك ف معندكش وقت تصرف اللي بتقبضة او تقضي اي وقت لطيف مع الناس اللي كلهم دايرين ف نفس الساقية ...
و الحلو ان حتي لو سرقت شوية وقت و خرجت مثلا بمجرد ما بترجع بتلاقي ان لأ انت لسة محتاج وقت اكبر , و انك لسه مفصلتش من الضغط.
انا شخصيا مش عارفة الاقي حل عشان اقدر افصل , عشان انا لسه بحاول أكتشف ده حتي مع كل اللي بعمله , بس يمكن انا اللي بزود الضغوط اللي عليا عشان مفضلش افكر ف اي حاجة تضايقني , مقعدش افكر ف اي شيء ف الدنيا غير شغلي و خلاص .. و ده مش صح و عارفة ده بس معنديش حاجة تانية ف الحياة تخليني افكر فيها بصراحة , مفيش حاجة بتشدني ليها بشكل كبير و تخليني احاول اني افضي وقت ليها , يمكن ده يتغير بعدين بس ف الوقت الحالي معنديش يعني و ده عامل ضغط طبعا بس الفكرة ان انا اللي حاطاه ع نفسي مش مجبره عليه...
Comments
Post a Comment