الجدع جدع و الجبان جبان

كان من اهم صفات المصريين زمان انهم جدعان عمرك ما كنت تلاقى حد فى مشكلة غير و تلاقى جنبة مش اقل من 5 واقفين معاة و بدون مقابل و فضلنا كدة فترة محترمة و ابتدت الجدعنة دى تقل شوية بشوية لحد ما كنا افتكرنا انها انعدمت تقريبا بقينا نشوف حاجات مش لايقة ع طبيعة مجتمعنا الشرقى اللى عمل عاداتة و تقاليدة بنفسة و بقينا نشوف ان ممكن حد يضايق بنت فى الشارع بغض النظر عن هيا عاملة اية فى نفسها بس كان كلة بيقول و انا مالى اوقع نفسى فى مشاكل لية

فضلوا كدة و ربونا ع كدة متكلمش فى السياسة احنا عايزنك يا حبيبى يا ابنى لو اتكلمت هيجرجرونا كلنا ع الاقسام و مستقبلك و مستقبل عيلتك هيدمر و حاجات من دى كتيييير

و منقدرش ننكر صحة بعض الحاجات دى بس انا بشوف ان لو فى ظاهرة متطرفة فى هيا حصلت لأن الشخص دة حاول انة يغير من نفسة يعمل حاجة مختلفة يحس بأن لية دور فى المجتمع هو اة الطريقة غلط بس ع الاقل حاول يغير

امال اية اللى حصل فى التحرير دة ازاى كانت الدنيا عاملة كدة فى التحرير مش دة برضة الشباب الطايش الشباب التافة اللى مش بيقرأ اللى

مش بيحب يكلم فى السياسة شباب تمورة و عمورة شباب اللى بيحب التفاهة اللى عمرة ما هيعمل حاجة مفيدة فى حياتة

مش دة برضة الشباب اللى اما كان بيشوف بنت فى الشارع حد بيضايقها بيقول و انا مالى و يرمى اللوم ع البنت سواء ما هيا اللى عاملة فى نفسها كدة مش شايفين لابسة اية دى لو لبسها مفيهوش غلطة ما هيا اللى مشيتها مش مظبوطة اى حاجة المهم انة يجيب لنفسة سبب عشان ميدافعش عنها سبحان الله هو نفسة الشباب فى التحرير اللى كانو عاملين زى كاردون حوالين البنات عشان يقفوا جنب بعض و محدش يضايقهم سبحان الله

هو نفسة الشباب اللى نزل بالملايين فى استفتاء التعديلات الاخير سواء قال نعم او لأ مش دى القضية القضية دلوقتى ان الشباب دة مكنش حاسس بالأنتماء و كان مقتنع ان البلد دى مش بلدة البلد دى بلدهم البلد دى تيكية و وسية ابوهم و الشعب دة ضيف عندهم و بالتالى انا اسافر او اهج ع برة و اغسل صحون احسن الف مرة من انى اقعد فى بلد مش حاسس فيها بالأمان

و دة كلة الحمدلله اتغير بعد الثورة ثورتنا اللى لسة مخلصتش ثورتنا ضد الظلم و الفساد و عدم المساواة و عدم احترام ادمية المواطن ثورتنا

عشان نقول ان البلد دى بلدنا مش بلدكم انتو لوحدكم البلد دى احنا اللى هنعليها و هنحافظ عليها

و عشان نقضى ع السلبية اللى جوانا لازم كلنا نجتمع ع هدف واحد و هو اننا نخلى البلد دى احسن بلد و دة مش هيحصل غيير لو كل واحد

فينا قام باللى علية و عمل شغلة ع اكمل وجة و مقصرش فى اداء عملة

محتاجين اننا نحس بقيمة البلد دى البلد دى من غيرنا يبقى عليها السلام احنا الجيل الجديد اللى هيحافظ ع البلد دى و يحميها

اللهم احفظ مصر و شعبها